Ladaki Bahin Yojana January installment 2025 Date
महाराष्ट्र सरकारची मुख्यमंत्री माझी लाडकी बहीण योजना सध्या खूप लोकप्रिय झाली आहे. महिलांना आर्थिकदृष्ट्या सक्षम करण्याच्या उद्देशाने राबवण्यात आलेल्या या योजनेअंतर्गत, महिलांना दर महिन्याला १,५०० रुपये दिले जातात. डिसेंबर महिन्याचा हप्ता महिन्याच्या शेवटच्या आठवड्यात जमा करण्यात आला होता. आता, जानेवारी महिन्याचा हप्ता कधी मिळणार याकडे लाभार्थी महिलांचे लक्ष लागले होते.
मकरसंक्रांतीपूर्वीच जानेवारीचा हप्ता जमा केला जाईल, असे आधी जाहीर करण्यात आले होते. मात्र, जानेवारीचे १५ दिवस उलटून गेले असून, मकरसंक्रांतीही संपली तरी महिलांच्या खात्यात पैसे जमा झालेले नव्हते. त्यामुळे लाभार्थी महिलांमध्ये अनेक प्रश्न उपस्थित झाले. आता, अखेर जानेवारी महिन्याचा हप्ता कधी जमा होणार हे स्पष्ट करण्यात आले आहे.
जानेवारी महिन्याचा हप्ता २६ जानेवारी २०२५ रोजी जमा होईल, असे मंत्री आदिती तटकरे यांनी सांगितले आहे. या घोषणेमुळे लाभार्थी महिलांना दिलासा मिळाला आहे. “२६ जानेवारीच्या अगोदर आम्ही महिलांना हप्ता देऊ, तसेच या महिन्यासाठी १,५०० रुपये प्रदान करण्यात येतील. आम्ही आमच्या जाहीरनाम्यात दिलेल्या सर्व योजना प्रभावीपणे अंमलात आणत आहोत,” असेही त्यांनी स्पष्ट केले.
याशिवाय, फेब्रुवारी महिन्याचा हप्ता वेळेवर मिळण्यासाठी सरकार तयारी करत आहे. मंत्रिमंडळाच्या बैठकीत या योजनेसाठी ३,६९० कोटी रुपयांच्या निधीच्या वितरणास मंजुरी देण्यात आली आहे. याच निधीतून जानेवारी महिन्याचा हप्ता वितरित करण्यात येईल. “लाभार्थी महिलांना वेळेवर हप्ता देणे ही आमची प्राथमिकता आहे,” असे आदिती तटकरे यांनी सांगितले.